السنة التحضيرية - المسار الصحي 1

 " لا تَحسبَن المجد تمرًا أنتَ آكِلهُ .. لن تبلُغَ المجد حتى تَلعقَ الصبرا "

- حسن شرف السعيدي دفعة 217 -

بسم الله الرحمن الرحيم . السلام عليكم ورحمة الله وبركاته 

أخواتي وأخواتي خريجي الثانوية والمقبلين على تجربة جديدة ومغايرة ، هذه المدونة لكم ولن أتحدث فيها عن تجربتي الشخصية تحديدًا وذلك بحكم اختلاف الظروف من شخص لآخر فقد تكون تجربة وردية لي ثم يصدمكم الواقع بشيء آخر أو تكون تجربة محبطة لي ومثبطة لكم وهذا ما لا أتمناه لكم . ولكن سأتكلم بشكل عام المواد وصعوبتها . بعض المشاكل التي قد تواجهك ، مالذي سيتغير وكيف هي الحياة الجامعية خصوصًا السنة الأولى فيها . نبدأ :

طبعًا عارف أنا الفترة هذه اللي تمر عليكم وهي فترة عصيبة . من توتر وانتظار القبول في الجامعات والحيرة بين التخصصات ومتابعة التسجيل في الجامعات وما إلى ذلك .. فالله يعينكم ويوفقكم . المهم أنا بحكي لكم هذه السنة بشكل محايد حتى لا تكون هذه المدونة سبب رئيس في اختيارك ففي النهاية هي رغبت وأنت من سيتعب لأجل المستقبل.

عمومًا التقديم في الجامعة كله إلكتروني ومن خلال موقع القبول والتسجيل . راح يبدأ تقديم طلب الالتحاق بالجامعة تاريخ 10 رمضان ويقفل 19 رمضان ومافيه أولوية للي يسجل قبل . 20 رمضان راح يعلنوا لكم عن المقبول بالدفعة الأولى وبعدها تكملوا إجراءاتكم إلكترونيًا من خلال الموقع . طبعًا في دفعة ثانية وثالثة لو مانقبلت بالدفعة الأولى وحطوك بمسار ثاني تقدم في الدفعة اللي بعدها وهكذا وإذا الله كاتب لك الخير فيه راح تنقبل إن شاء الله . , وهذه النسب الموزونة للسنوات السابقة ( 40% تحصيلي ، 30% قدرات ، 30% ثانوية ) : 

إن شاء الله بعد قبولكم وانتهاء الإجراءات الإلكترونية بيرسلوا لكم رسالة على الجوال محدد فيه موعد اختبار اللياقة الصحية وهو كشف صحي عادي في مستشفى الملك فهد الجامعي بالخبر . اللي أتذكره سحبوا منا دم وقابلنا دكتورة سألتنا عن الأمراض الوراثية وبس لكن طولنا بسبب الزحمة حاولوا تجو قبل الموعد عشان تاخذوا رقم وتخلصوا بدري أنا أخذت ساعتين رغم إني جيت على الوقت تماما . المطلوب احضاره صورة شخصية وإشعار القبول تطبعه من الموقع

بعد اجتياز الكشف وأعتقد الكل يجتازه يعني مافيه خوف أنت إن شاء الله رسميا طالب في الجامعة . 

بعد كذا فيه اختبار تحديد مستوى في اللغة الإنجليزية ( Placement Test ) . وهو اختبار سهل يعني أساسيات تقريبًا وكله اختياري نفس اختبارات قياس . طبعًا لا تذاكر له لأنه يقيس مستواك في اللغة وبناءً عليه يصنفوك انت بأي مستوى . والاختبار ماعليه أي درجات ولا يؤثر على القبول.  عندنا طبعًا 3 مستويات :

- متقدم ِ/ Advance

- متوسط / Intermediate

- مبتدئ / Beginner

حاول إنك تحل حسب قدرتك عشان يحطوك بالمستوى الحقيقي لك وكذا تستفيد اكثر . طبعا االفرق بين المستويات الثلاثة هو :

1- الدوام : المتقدم دوامهم أقل شيء وبعدهم المتوسط وأكثر ساعات دوام المبتدئ .

2- الكتب : المتقدم يدرس Book 4 , Book 5 . أما المتوسط يدرس 3 و 4 و5 . والمبتدئ يدرس 2 و3 و4 و5 عشان كذا محاضاراتهم أكثر شيء .

وتستطيع أيضا إنك تلغي الإنجليزي من عندك بشرط إنك تجيب درجة معينة في اختبار الآيلتس بكذا راح تستفيد كثير من الوقت لأن تقريبا 20 ساعة في الاسبوع راح تشيلها من جدولك . تستطيع تستفسر من الجامعة بعدين .

أول أسبوع دراسة مافيه شيء فقط 3 أيام البرنامج التعريفي ومهم تحضروه عشان تستفيدوا بيعلموكم كل شيء فيه عشان لاتضيعوا .

وقبل بداية الدراسة الفعلية في اختبار Speaking . كنت متوتر أنا وخايف شوي صراحة كان يجي دكتور ويسألك سؤال أو سؤالين تكلم عن نفسك وتكلم عن أشياء تحبها . بس سهل جدا ومايؤثر بشيء لأن خلاص حددوا مستواك في الاختبار التحريري .

كيف هي السنة التحضيرية ؟

عندك في الفصل الدراسي الأول 7 مواد تدرسها . منها 4 مواد سنوية يعني تدرسها الترم الثاني أيضا و 3 مواد فصلية تدرسها بس الترم الأول . وفيه لاب أو معمل لمواد الكمستري والفيزكس والبايولوجي . أسبوع يكون فيه لاب وأسبوع مافيه لذلك الأسبوع اللي مافيه لابات بيكون عندك بريكات طويلة . أنا كان عندي بريك 3 ساعات وبريك 5 ساعات . الله يعينك عاد شوف وين تقضي هالوقت .

 الدوام يبدأ الساعة 8:00 صباحًا وينتهي 5:00 مساءً . صحيح دوام طويل ومتعب ويطفش لكن بعدين بتتعود عليه طبعا فيه تفصيل لوقت الدوام بعدين نتكلم عنه .

نبدأ نتكلم عن المواد في الترم الأول :

 General English Language - لغة إنجليزية عامة 

هذه من أهم المواد في السنة التحضيرية لأن عليها أكثر عدد من الساعات في المعدل مقارنة ببقية المواد عليها 7 ساعات يعني تأثر بشكل واضح في المعدل ممكن ترفعك أو تنزلك فاحرص إنك ماتضيع الدرجات فيها . هذه الماد هي سبب  طول الدوام لأن احنا كمستوى متوسط كنا ندرس 4 ساعات يوميا فقط للإنجلش . من الساعة 8 ص إلى 10ص هذه المحاضرة الأولى والمحاضرة الثانية من 3 م إلى 5 م . فكان متعب الدوام عدا يوم الخميس بس ساعتين الصباح فكان ينتهي دوامنا 12 أو 3 على حسب الجدول . لكن في محاضرة الإنجلش يمشي بسرعة لأن فيها تفاعل المحاضرة مو بس دكتور يهدر عليك . فيها 5 أسايمنتس وفيها تعليم إلكتروني يعني لازم تدخل البلاك بورد حق الجامعة وتحل أسئلة وفيه كوزات وبراكتس تست أون لاين وعليهم درجات أتوقع 20% مع الحضور وكذا . أول اختبار ( الميدتيرم ) من 10 كان صعب شوي باعتبار أول اختبار ومو متعودين لكن الفاينل كان أسهل بكثير . طبعا اختبارين فقط في الترم الأول . درسنا كتابين بوك 3 و بوك 4 . الترم الثاني الميدتيرم كان صعب مررة أصعب اختبار بس الحمد لله الفاينل كان سهل . درسنا بوك 5 فقط . طبعا بتقل عدد الساعات في الأسبوع إلى تقريبا 12 ساعة .

كيف نذاكر ؟ إنجلش عادة مافي شيء تذاكره احفظ بس الفوكاب وافهم القرامر والباقي انت وشطارتك في Listening , Reading , Speaking , Writing

أحياء عامة - General Biology

هذه المادة من المواد المهمة أيضا عليها ساعات كثيرة في المعدل ( 5 ساعات ) بالإضافة أنها مرتبة بالمجال الصحي أكثر من غيرها . المادة جدًا ممتعة وحليوة بتدرس فيها الخية ومكوناتها وتركيب الجسم  وأجهزة الجسم ووظائفها . المادة مو صعبة بس تحتاج كرف لأن كمية كبيرة من المعلومات تحتاج تحفظها فحاول إنك تفهم في المحاضرة وتحفظ ولا تخليه يتراكم عليك . اختبار الميدتيرم كان سهل وبسيط بس الفاينل صعب شوي . الترم الثاني نفس الشيء الميد سهل بس الفاينل كان صعب بس لأن انضغطنا واجد مع تقديم الاختبارات وكنا نذاكر تقريبا 8 شابترات في يومين فكنت أكافح عشان أخلصهم خلال يومين ولا قدرت أخلصهم كلهم بس الحمد لله . أيضا فيه لاب لهذه المادة حلو وجميل يخلوك تشوف خلايا بالمجهر مثلا وكذا ..

مذاكرة المادة متعبة شوي لأن كل حفظ وطويل فلازم أول بأول عشان لا يتراكم عليك ، المذاكرة من السلايدات تكفي أنا شريت الكتاب وندمت أصلا مافتحته اللي يبغى يشتريه يقول خخ .

Physics - الفيزياء

هذه المادة العقدة بالنسبة للطلاب لأكثر من سنة . أنا كرهت الفيزياء بسببها لأن سببت لي عقدة والاختبارات كانت صعبة وأسئلتهم لف ودوران ، تطلع من الاختبار تحس إنك حليت عدل وتنصدم بالدرجات . كنت كل اختبار أطلع مصدوم حسبي الله . لذلك انتبهوا وركزا عليها عدل أعرف كم واحد رسبوا في ذي المادة إن شاء الله تمشي أموركم إذا كنتوا مركزين وتفهموا المنهج صح أهم شيء تتدربوا على حل الأسئلة اللي يحطوها لكم بالبلاك بورد . هذه المادة سنوية تاخذونها في سمسترين . مذاكرتها من السلايدات يكفي . ساعة وحدة بس بالأسبوع من 10-11 . عليها 3 ساعات في المعدل .

Chemistry - الكيمياء

هذه المادة سهلة ولطيفة الحمد لله اختباراتهم حليوة ومذاكرتها ماتتعب ذاكروا من السلايدات يكفي ولاتشتروا الكتاب ،  بالترم الثاني بتاخذوا الكيمياء العضوية أو Organic Compound هذه فيها حفظ شوي ويبغى له تركيز في المحاضرة عشان تفهمه بس سهل وممتع . ساعة وحدة بس بالأسبوع من 10-11 . عليها 3 ساعات في المعدل .

Computer Skills - مهارات الحاسب الآلي

هذه مادة فصلية تاخذوها بالترم الأول بس . مادة سهلة جدًا تجيبوا فيها A و A+ بسهولة إن شاء الله . ندرس فيها برامج الوورد والإكسل والباوربوينت والاكسس ( هذا صعب شوي ). المحاضرات كانت تنعس وتجيب النوم كان وقت المحاضرة بعد بريك الغداء من 1-3 يومين في الأسبوع . مذاكرتها من الكتاب وحاول تطبق عمليًا . وتدرسه بالأنجليزي وعليها ساعتين في المعدل

Learning and Searching skills - مهارات البحث والتعلم

مادة فصلية بس بالترم الأول وسهلة جدا بالراحة تاخذوا فيها A و A+ . محاضرتها ساعتين من 10-12 يوم واحد في الأسبوع . المادة ماتحتاج مذاكرة بس قراءة سلايدات . الكتاب شريته وماستفدت منه شيء . وتدرسها بالإنجليزي . عليها ساعتين في المعدل

Faith Morals - العقيدة الإسلامية والأخلاق .

مادة فصلية بالترم الأول فقط وسهلة جدًا يعني A+ مضمون فيها عليها ساعتين في المعدل . محاضرة وحدة في الأسبوع لمدة ساعتين بالنسبة لي ممتعة . المذاكرة من الكتاب .

هذه المواد اللي بتاخذوها بالترم الأول بوريكم جدولي أنا :

مثل ماتلاحظوا دوامي يوميًا يبدأ الساعة 8:00 عدا يوم الثلاثاء يكون فيه E-Learning لمادة الإنجلش كان الكلاس ملغي أو يعطينا ساعة وحدة أو نبدأ من 9 على حسب دكتورك . كذلك ينتهي دوامي يوميًا الساعة 5:00 العصر عدا الخميس يخلص 3 أو 12 على حسب الأسبوع إذا كان فردي يكون عندي لاب من 1-3 أو زوجي مايكون عندي شيء وأطلع 12:00 . عندي لاب يوم الأحد والثلاثاء والخميس بنفس الوقت . هذا كله تختاره بعدين انت لما تبدأ الدراسة .

نجي للترم الثاني والمواد الفصلية اللي تاخذها بالإضافة للمواد السنوية ( الأحياء والفيزياء والكيمياء والإنجليزي ) :

مهارات التواصل - Communication Skills

مادة سهلة أيضًا تدرسها بالإنجليزي مذاكرتها قراءة السلايدات تكفي و A+ مضمونة إن شاء الله . لها محاضرة واحدة بالأسبوع لمدة أسبوعين وعليها ساعتين في المعدل .

اللغة الإنجليزية الأكاديمية - English for Academic

هذه المادة تتعلم فيها المصطلحات الطبية وتكون تخصصية أكثر وأكاديمية . مو صعبة المادة ولطيفة . مذاكرتها مثل الإنجليزي العام أهم شيء تحفظ المصطلحات وانت بتكون عارف بعضها من مادة البايو .

التربية البدنية والصحية - Physical Education

هذه المادة أول 5 أسابيع تقريبا بتكون محاضرات نظري تتعلم فيها أنواع الإصابات والحروق وطريقة التعامل معها والإسعافات الأولية والإنقاذ . بعدها تكون في الصالة الرياضية تمارسوا بعض التمارينات والألعاب وتدريبات عملية على الإنعاش . مادة سهلة وحليوة ودراستها بالعربي .

النظام الاجتماعي في الإسلام - Social System in Islam

مادة بسيطة والدرجات مضمونة ودراستها بالعربي والمذاكرة من الكتاب أو السلايدات .

وبكذا غطينا جميع المواد اللي بتدرسها هذه السنة إن شاء الله إني لخصت أهم الأشياء اللي تفيدكم .

الاختبارات في السنة التحضيرية

تقريبًا أول 7 أسابيع ماعندكم اختبارات ممكن بعض المواد يكون فيها كوزات بسيطة مثل مادة مهارات التواصل أو مهارات التعلم . وممكن يكون كوزات اون لاين بالنسبة للبايولوجي وكويز في لاب الكمستري . أما الاختبارات الفعلية الللي هي ميدتيرم تبدأ بعد 7 أسابيع ويكون كل أسبوع اختبار . وإذا بدأت الميدتيرمات مابتشوف روحك إلا في معمعة الفاينلز . دفعتنا في البداية كانت اختباراتنا على كومبيوترات لكن الطلاب اشتكوا ورجعوها إلى ورقي مثل طريقة قياس .

بالنسبة لمواد العلمي السنوية الدرجات كالتالي :
- الميد الأول 15 درجة
- الفاينل 25 درجة
- الميد الثاني 15 درجة
- الفاينل 25 درجة
باقي 20 درجة تتوزع بين اللاب والحضور والمشاركة تقريبا شبه مضمونة العشرين.

بالنسبة للإنجليزي :
- أول ميد 10 درجات
- الفاينل 10 درجات
- الميد الثاني 10 درجاتل
- الفاينل 50 درجة
20 درجة تتوزع بين الكويزات والبراكتس تست وIQ اون لاين فيه تدريبات .

بقية المواد يختلف توزيعها .

الكليات والتخصصات بعد السنة التحضيرية

هناك عدة كليات وتخصصات تستطيع المنافسة على مقاعدها بعد إنهاء السنة التحضيرية علمًا بأنك لا تضمن مقعد في أي كلية عند قبولك المسار الصحي بل يشترط اجتياز السنة ثم اختيار التخصص .
الكليات هي :

1- كلية الطب البشري : يشترط للمنافسة على مقاعد كلية الطب أن تحصل على درجة لا تقل عن B مايساوي ( 80%) في المواد العلمية الأحياء والفيزياء والكيمياء والإنجليزي العام والأكاديمي ، ثم دخولك المفاضلة مع منافسيك على المقعد وتستوعب الكلية حوالي 120 طالب على الأكثر . تتخرج بشهادة بكالوريوس طب وجراحة مدة الدراسة 7 سنوات ( سنة تحضيرية  + 5 سنوات تخصص + سنة تطبيق ) تتخرج برتبة مهنية ك طبيب .

2- كلية طب الأسنان : يشترط للمنافسة على مقاعد كلية طب الأسنان أن تحصل على درجة B في اللغة الإنجليزية العامة والتخصصية . و درجة C+ أي مايساوي 75% في المواد العلمية الأحياء والفيزياء والكيمياء . مدة الدراسة 7 سنوات بكالوريوس طب وجراحة الفم والأسنان برتبة طبيب أسنان .

3- كلية الصيدلة الإكلينيكية : يشترط للمنافسة على مقاعد كلية الصيدلة حصولك على درجة B+ في الكيمياء مايساوي 85% و B في مواد اللغة الإنجليزية و C في مادتي الفيزياء والأحياء . مدة الدراسة 7 سنوات تتخرج برتبة مهنية ك طبيب صيدلي .

4- كلية العلوم الطبية التطبيقية : لا يشترط لدخولك الكلية أي درجات محددة فقط اجتياز السنة بمعدل 3 من 5 والدخول في المفاضلة . تحتوي هذه الكلية على تخصصات عدة :
- الرعاية التنفسية
- الرعاية الطبية الطارئة ( طلاب فقط )
- علاج طبيعي
- علوم إشعاعية
- مختبرات إكلينيكية ( طالبات فقط )
- تغذية علاجية ( طالبات فقط )
- تقنية قلب ( طالبات فقط )

وأغلب هذه التخصصات مدة دراستها 5 سنوات ( سنة تحضيرية + 3 سنوات تخصص + سنة تطبيق ) وتتخرج ك أخصائي على حسب التخصص بإمكانكم البحث أكثر في موقع الجامعة : https://www.uod.edu.sa/ar

نصائح وتوجيهات

- حط لك هدف تبغى توصل له من البداية واسعى لتحقيقك أولا بالتوكل على الله وثانيا بالاجتهاد والمثابرة والعمل على تحقيقه .

- كن راضيًا دائما بما يكتبه الله لك ففيه الخير والصلاح لك الرضا بقضاء الله وقدره هو مايجعلك تعيش في راحة نفسية .

- جميع التخصصات في الجامعة ممتازة ومطلوبة وليس هناك تخصص أفضل من آخر ولا تدع أحدا يقلل من قيمة تخصصك . فقط اختار ماتحب وماترى أنه مناسب لك ولمستقبلك .

- المذاكرة أول بأول ولا تجعلها تتراكم عليك بتتعب في النهاية .

- في البداية ستجد صعوبة في المذاكرة بسبب المصطلحات والكلمات الإنجليزية الجديدة عليك وبتستهلك وقت كثير في الترجمة لكن بعدها بصير شيء سهل . يعني شهر أو شهرين وبتكون ملم بالمصطلحات ولن تترجم كثيرًا

- حاول تحسن لغتك الإنجليزية في الإجازة أفضل حتى تكسب الوقت بعدين .

- الدوام طويل ومنهك خصوصا للي مشوارهم بعيد . لكن إن شاء الله تتعود .

- في الإنجليزي عندك ساعات غياب كثيرة خليها لآخر شيء لأنك إن بديت تسحب وغيب بصير الدوام عليك صعب .

- دائما اعطِ نفسك حقها ولاتقصر على نفسك بشيء من الراحة والترفيه ولاتخلي وقتك فقط دوام مذاكرة لأن هذه السنة هي سنة ضغط نفسي وضغط دراسي فوازن بين الأمور حتى تستطع تعدي هذه المرحلة .

- المرحلة الجامعية نقطة تحول في حياتك وهي جميلة رغم الضغوطات والعقبات هي فترة وتنتهي . قد تكون سنة صعبة لكن لذة النجاح ستنسيك كل الآلام .

- الجامعة بيئة جديدة عليك تختلف كليا عن المدرسة . حيث تكون أنت المسؤول الأول عن نفسك مافي أحد يجبرك على شيء لك الحرية تحضر أو لا تذاكر أو لا ولكن في النهاية أنت أدرى بمصلحتك .

- الدكاترة بالجامعة غير عن المعلمين بالمدرسة في بعضهم شرحهم سيء وبعضهم ممتاز ولاتعتمد كليا عليه بل اعتمد على نفسك أكثر .

ملاحظات

- تحتاج تشتري لاب كوت ( بالطو ) حق اللابات وماتدخل بدونه .
- السلايدات موجودة بالكوبي سنتر في الجامعة كل شابتر تنزل سلايداته قبل المحاضرة اشتريهم وذاكر منهم .
- مطعم الجامعة فطور وغداء وعشاء وبسعر رخيص . وفيه كافتيريا وفيه دانكن دونتس عشان تاخذ لك قهوة وتصحصح . الكانتين بعد بطاطسهم حلو .
- فيه مسبح بالجامعة تقدر تسبح فيه لو بغيت وفيه جم وملاعب رياضية .

في النهاية أتمنى إني قدمت لكم شيء بسيط تستفيدوا منه وتدعوا لي برحمة الوالدين . حسن شرف السعيدي دفعة 217 طالب مسار صحي سابقًا 
والأن على مشارف التخصص بإذن الله.

أي سؤال أو استفسار عندكم عن الجامعة وأي مساعدة أنا حاضر بالخدمة :

Twitter : @saeedi_98

Ask.fm : @saeedi_98